ETA TALDE TERRORISTAREN ATENTATUA, 2003KO MAIATZAREN 30EAN

2003ko maiatzaren 30ean, ETA talde terroristak atentatua egin zuen Zangozan, eta bi polizia nazional hil zituen egun argiz, Santo Domingo plazan jarritako lapa-bonba baten bidez. Harrezkero, data hori urtero gogoratzen da, eta 2023az geroztik Julián Embid eta Bonifacio Martíni egindako omenaldi ofizialaren eguna da.

Bonifacio eta Julián

JULIÁN EMBID LUNA ETA BONIFACIO MARTÍN HERNÁNDEZ

Polizia Nazionaleko agenteak ziren Julián Embid Luna eta Bonifacio Martín Hernández. Nafarroako landa-eremuetako udalerrietara joaten zen unitate mugikorreko kideak ziren, herritarren NANa berritzeko. 2003ko maiatzaren 30ean Zangozara joan ziren beste lankide batekin batera, Ramón Rodríguezekin. Kultur Etxean egin zuten beren lana, eta eguerdiko 12:00ak igaro ondoren, materiala jaso eta Santo Domingo plazan aparkatuta zuten bereizgarririk gabeko Citroën ZX autorantz abiatu ziren.

Julián eta Bonifacio izan ziren ibilgailuan lehenengo sartu eta martxan jarri zutenak. Autoa atzerantz mugitzen hasi zenean, ibilgailuaren azpialdean itsatsitako bonba batek eztanda egin zuen. Leherketaren ondorioz, ibilgailua presio-eltze bihurtu zen; karrozeriaren zatiak eta agenteen gorpuak indar handiz aireratu ziren.

Julián Embid, 53 urtekoa, ezkonduta zegoen eta bi seme-alaba zituen.

Bonifacio Martín, 56 urtekoa, ezkonduta zegoen eta bi alaba zituen.

BESTE ATENTATU BAT, BIKTIMARIK GABE

Adineko askoren oroimenean ere badago 1983ko azaroaren 8an gertatutako beste atentatu bat, biktimarik eragin ez zuena. Goma-2 lehergaiaren kilo eta erdiz osatutako artefaktu batek eztanda egin zuen gauerdian Zangozako Banco Central bankuaren egoitzaren aurrean, Kale Nagusian. Kalte material handiak eragin zituen bankuaren egoitzan bertan, inguruan aparkatutako ibilgailuetan, hurbileko saltokietan eta Udaletxeko erlojuan.

Atentatu hura bost eguneko epean banku-sukurtsal baten aurka egindako hirugarren atentatua izan zen.